AVLVLARIA
ARGVMENTVM I
  Senex avarus vix sibi credens Euclio ar1.1
domí suae defóssam multis cúm opibus
aulam invenit, rursumque penitus conditam
exanguis amens servat. eius filiam
Lyconides vitiarat. interea senex 5
Megadorus a sorore suasus ducere
uxorem avari gnatam deposcit sibi.
durús senex víx promittit, atque aulae timens
domo sublatam variis abstrudit locis.
insidias servos facit huius Lyconidis 10
qui virginem vitiarat; atque ipse obsecrat
avonculum Megadorum sibimet cedere
uxorem amanti. per dolum mox Euclio
cum perdidisset aulam, insperato invenit
laetusque natam conlocat Lyconidi. 15
ARGVMENTVM II
Aulam repertam auri plenam Euclio ar2.1
Vi summa servat, miseris adfectus modis.
Lyconides istius vitiat filiam.
Volt hanc Megadorus indotatam ducere,
Lubensque ut faciat dat coquos cum obsonio. 5
Auro formidat Euclio, abstrudit foris.
Re ómni inspecta compressoris servolus
Id surpit. illic Euclioni rem refert.
Ab eo donatur auro, uxore et filio.