| LXXXVI | |
| Quod nec carmine glorior supino | 2.86.1 |
| Nec retro lego Sotaden cinaedum, | |
| Nusquam Graecula quod recantat echo | |
| Nec dictat mihi luculentus Attis | |
| Mollem debilitate galliambon: | 5 |
| Non sum, Classice, tam malus poeta. | |
| Quid si per gracilis vias petauri | |
| Invitum iubeas subire Ladan? | |
| Turpe est difficiles habere nugas | |
| Et stultus labor est ineptiarum. | 10 |
| Scribat carmina circulis Palaemon, | |
| Me raris iuvat auribus placere. |