| III | |
| Argiletanas mavis habitare tabernas, | 1.3.1 |
| Cum tibi, parve liber, scrinia nostra vacent. | |
| Nescis, heu, nescis dominae fastidia Romae: | |
| Crede mihi, nimium Martia turba sapit. | |
| Maiores nusquam rhonchi: iuvenesque senesque | 5 |
| Et pueri nasum rhinocerotis habent. | |
| Audieris cum grande sophos, dum basia iactas, | |
| Ibis ab excusso missus in astra sago. | |
| Sed tu ne totiens domini patiare lituras | |
| Neve notet lusus tristis harundo tuos, | 10 |
| Aetherias, lascive, cupis volitare per auras: | |
| I, fuge; sed poteras tutior esse domi. |