| LVII | |
| Dum nos blanda tenent lascivi stagna Lucrini | 4.57.1 |
| Et quae pumiceis fontibus antra calent, | |
| Tu colis Argei regnum, Faustine, coloni, | |
| Quo te bis decimus ducit ab urbe lapis. | |
| Horrida sed fervent Nemeaei pectora monstri, | 5 |
| Nec satis est, Baias igne calere suo. | |
| Ergo sacri fontes et litora grata valete, | |
| Nympharum pariter Nereïdumque domus. | |
| Herculeos colles gelida vos vincite bruma, | |
| Nunc Tiburtinis cedite frigoribus. | 10 |