<CICERO ATTICO SAL.>
L. Iulio Caesare C. Marcio Figulo consulibus filiolo me auctum 1.2.1.1
scito, salva Terentia. abs te iam diu nihil litterarum. ego de
meis ad te rationibus scripsi antea diligenter. hoc tempore
Catilinam, competitorem nostrum, defendere cogitamus.
iudices habemus quos volumus, summa accusatoris voluntate. 5
spero, si absolutus erit, coniunctiorem illum nobis fore in
ratione petitionis; sin aliter acciderit, humaniter feremus.
  Tuo adventu nobis opus est maturo. nam prorsus summa 2.1
hominum est opinio tuos familiaris, nobilis homines, adver-
sarios honori nostro fore. ad eorum voluntatem mihi conciliandam
maximo te mihi usui fore video. qua re Ianuario ineunte, ut
constituisti, cura ut Romae sis. 5