AD HECTORIS TVMVLVM
Martia progenies, Hector, tellure sub ima 1.1
  fas audire tamen si mea uerba tibi,
respira, quoniam uindex tibi contigit heres,
  qui patriae famam proferat usque tuae.
Ilios en surgit rursum inclita, gens colit illam 5
  te Marte inferior, Martis amica tamen.
Myrmidonas periisse omnes dic, Hector, Achilli,
  Thessaliam et magnis esse sub Aeneadis.
DE PVERO GLACIE PEREMPTO
Thrax puer adstricto glacie cum luderet Hebro, 2.1
  frigore frenatas pondere rupit aquas
cumque imae partes fundo raperentur ab imo,
  abscidit a iugulo lubrica testa caput.
quod mox inuentum mater cum conderet igni, 5
  'hoc peperi flammis, cetera' dixit 'aquis'.
me miseram! plus amnis habet solumque reliquit,
  quo nati mater nosceret interitum.