| Abdicatus heres ob tyrannicidium | |
| Abdicatus de paternis bonis nihil habeat. Quidam hortatus est in | 374.pr.1 |
| tyrannicidium filium. Nolentem abdicavit. Moriens scripsit heredem qui | |
| tyrannum occidisset. Abdicatus occidit. Petit bona. | |
| DECLAMATIO | |
| 'Abdicatus' inquit 'ne quid de bonis patris capiat.' Paterna haec esse | 1.1 |
| bona constat, abdicatum te esse aeque patet: quae ultra quaestio est? | |
| 'Heredem' inquit 'scripsit tyrannicidam, ego autem tyrannum occidi.' | 2.1 |
| Nihil refert an aliquod ius postea adquisieris: filii perdidisti. Lex enim | |
| quae abdicatis paterna bona negat per omnia illos amovet: supervacuum | |
| namque erat abdicatum submovere, qui alioqui perdiderat paternam | |
| domum. Igitur lex ita scripta est ne qua lege reverti in domum posset. | 5 |
| Licet ergo sis tyrannicida, non prodest tibi: nec ulla lex reducit quem | 3.1 |
| aliqua exclusit et semper, iudices, potentior lex est quae vetat quam quae | |
| permittit: 'ne quid' inquit 'ex bonis capiat.' Hoc etiam in magistratuum | |
| potestate servatur, et plus potest, inquit, unus qui vetat quam omnes qui | |
| iubent. In permittente enim libera potestas, in vetante poena est. Deinde | 4.1 |
| haec lex publica est, ad omnes pertinet: testamentum privatum est. | |
| Potentius est quod in albo lego quam quod in testamento. | |
| 'Sed pater' inquit 'voluit me esse heredem, et ideo tyrannicidam | 5.1 |
| scripsit quia sciebat me facturum tyrannicidium.' Falleris: te namque | |
| minime voluit. Nam si voluisset, scripsisset: 'filius meus, si fecerit | |
| tyrannicidium, heres mihi sit.' Nunc autem apparet dolentem iratumque | |
| scripsisse, et adoptare in locum filii tyrannicidam voluisse quia in | 5 |
| virtutem tyrannicidae filium excitare non poterat. Iratum tibi dico fuisse: | 6.1 |
| abdicavit. Numquam leviter excandescunt patres. Et qua causa? Quod | |
| tyrannum non occideras. Vides quemadmodum inertiam execratus sit ne | |
| iudiciis quidem malis excitatam. Tantum abdicavit? Immo non reduxit. | |
| Passus est exulare, ne moriens quidem miseritus est, etiam testamento | 5 |
| exheredavit, etiam alios adoptavit. |