| LII | |
| Tempora Pieria solitus redimire corona, | 12.52.1 |
| Nec minus attonitis vox celebrata reis, | |
| Hic situs est, hic ille tuus, Sempronia, Rufus, | |
| Cuius et ipse tui flagrat amore cinis. | |
| Dulcis in Elysio narraris fabula campo, | 5 |
| Et stupet ad raptus Tyndaris ipsa tuos: | |
| Tu melior, quae deserto raptore redisti, | |
| Illa virum voluit nec repetita sequi. | |
| Ridet et Iliacos audit Menelaus amores: | |
| Absolvit Phrygium vestra rapina Parim. | 10 |
| Accipient olim cum te loca laeta piorum, | |
| Non erit in Stygia notior umbra domo: | |
| Non aliena videt, sed amat Proserpina raptas: | |
| Iste tibi dominam conciliabit amor. |