| XXXVII | |
| Quidquid ponitur hinc et inde verris, | 2.37.1 |
| Mammas suminis imbricemque porci | |
| Communemque duobus attagenam, | |
| Mullum dimidium lupumque totum | |
| Muraenaeque latus femurque pulli | 5 |
| Stillantemque alica sua palumbum. | |
| Haec cum condita sunt madente mappa, | |
| Traduntur puero domum ferenda: | |
| Nos accumbimus otiosa turba. | |
| Ullus si pudor est, repone cenam: | 10 |
| Cras te, Caeciliane, non vocavi. |