| XLVI | |
| Florida per varios ut pingitur Hybla colores, | 2.46.1 |
| Cum breve Sicaniae ver populantur apes, | |
| Sic tua subpositis conlucent prela lacernis, | |
| Sic micat innumeris arcula synthesibus, | |
| Atque unam vestire tribum tua candida possunt, | 5 |
| Apula non uno quae grege terra tulit. | |
| Tu spectas hiemem succincti lentus amici | |
| —Pro scelus!—et lateris frigora trita times. | |
| Quantum erat, infelix, pannis fraudare duobus— | |
| Quid metuis?—non te, Naevole, sed tineas? | 10 |