| LXXV | |
| Verbera securi solitus leo ferre magistri | 2.75.1 |
| Insertamque pati blandus in ora manum | |
| Dedidicit pacem subito feritate reversa, | |
| Quanta nec in Libycis debuit esse iugis. | |
| Nam duo de tenera puerilia corpora turba, | 5 |
| Sanguineam rastris quae renovabat humum, | |
| Saevos et infelix furiali dente peremit: | |
| Martia non vidit maius harena nefas. | |
| Exclamare libet: 'crudelis, perfide, praedo, | |
| A nostra pueris parcere disce lupa!' | 10 |