| XC | |
| Quintiliane, vagae moderator summe iuventae, | 2.90.1 |
| Gloria Romanae, Quintiliane, togae, | |
| Vivere quod propero pauper nec inutilis annis, | |
| Da veniam: properat vivere nemo satis. | |
| Differat hoc, patrios optat qui vincere census | 5 |
| Atriaque inmodicis artat imaginibus. | |
| Me focus et nigros non indignantia fumos | |
| Tecta iuvant et fons vivos et herba rudis. | |
| Sit mihi verna satur, sit non doctissima coniunx, | |
| Sit nox cum somno, sit sine lite dies. | 10 |