| XLVI | |
| Saturnalia divitem Sabellum | 4.46.1 |
| Fecerunt: merito tumet Sabellus, | |
| Nec quemquam putat esse praedicatque | |
| Inter causidicos beatiorem. | |
| Hos fastus animosque dat Sabello | 5 |
| Farris semodius fabaeque fresae, | |
| Et turis piperisque tres selibrae, | |
| Et Lucanica ventre cum Falisco, | |
| Et nigri Syra defruti lagona, | |
| Et ficus Libyca gelata testa | 10 |
| Cum bulbis cocleisque caseoque. | |
| Piceno quoque venit a cliente | |
| Parcae cistula non capax olivae, | |
| Et crasso figuli polita caelo | |
| Septenaria synthesis Sagunti, | 15 |
| Hispanae luteum rotae toreuma, | |
| Et lato variata mappa clavo. | |
| Saturnalia fructuosiora | |
| Annis non habuit decem Sabellus. |