| LXXXVIII | |
| Nulla remisisti parvo pro munere dona, | 4.88.1 |
| Et iam Saturni quinque fuere dies. | |
| Ergo nec argenti sex scripula Septiciani | |
| Missa nec a querulo mappa cliente fuit, | |
| Antipolitani nec quae de sanguine thynni | 5 |
| Testa rubet, nec quae cottana parva gerit, | |
| Nec rugosarum vimen breve Picenarum, | |
| Dicere te posses ut meminisse mei? | |
| Decipies alios verbis voltuque benigno, | |
| Nam mihi iam notus dissimulator eris. | 10 |