| LXXX | |
| Non totam mihi, si vacabis, horam, | 5.80.1 |
| Dones et licet inputes, Severe, | |
| Dum nostras legis exigisque nugas. | |
| 'Durum est perdere ferias': rogamus, | |
| Iacturam patiaris hanc ferasque. | 5 |
| Quod si legeris ista cum diserto | |
| —Sed numquid sumus inprobi?—Secundo, | |
| Plus multo tibi debiturus hic est, | |
| Quam debet domino suo, libellus. | |
| Nam securus erit, nec inquieta | 10 |
| Lassi marmora Sisyphi videbit, | |
| Quem censoria cum meo Severo | |
| Docti lima momorderit Secundi. |