| LXXVII | |
| Cum sis tam pauper, quam nec miserabilis Iros, | 6.77.1 |
| Tam iuvenis, quam nec Parthenopaeus erat, | |
| Tam fortis, quam nec, cum vinceret, Artemidorus, | |
| Quid te Cappadocum sex onus esse iuvat? | |
| Rideris multoque magis traduceris, Afer, | 5 |
| Quam nudus medio si spatiere foro. | |
| Non aliter monstratur Atlans cum compare ginno | |
| Quaeque vehit similem belua nigra Libyn. | |
| Invidiosa tibi quam sit lectica, requiris? | |
| Non debes ferri mortuus hexaphoro. | 10 |