| XCVII | |
| Nosti si bene Caesium, libelle, | 7.97.1 |
| Montanae decus Umbriae Sabinum, | |
| Auli municipem mei Pudentis, | |
| Illi tu dabis haec vel occupato: | |
| Instent mille licet premantque curae, | 5 |
| Nostris carminibus tamen vacabit: | |
| Nam me diligit ille proximumque | |
| Turni nobilibus legit libellis. | |
| O quantum tibi nominis paratur! | |
| O quae gloria! quam frequens amator! | 10 |
| Te convivia, te forum sonabit, | |
| Aedes, compita, porticus, tabernae. | |
| Uni mitteris, omnibus legeris. |