| XI | |
| Nomen cum violis rosisque natum, | 9.11.1 |
| Quo pars optima nominatur anni, | |
| Hyblam quod sapit Atticosque flores, | |
| Quod nidos olet alitis superbae; | |
| Nomen nectare dulcius beato, | 5 |
| Quo mallet Cybeles puer vocari | |
| Et qui pocula temperat Tonanti, | |
| Quod si Parrhasia sones in aula, | |
| Respondent Veneres Cupidinesque; | |
| Nomen nobile, molle, delicatum | 10 |
| Versu dicere non rudi volebam: | |
| Sed tu syllaba contumax rebellas. | |
| Dicunt Eiarinon tamen poetae, | |
| Sed Graeci, quibus est nihil negatum | |
| Et quos Ἆρες Ἄρες decet sonare: | 15 |
| Nobis non licet esse tam disertis, | |
| Qui Musas colimus severiores. |