| LI | |
| Sidera iam Tyrius Phrixei respicit agni | 10.51.1 |
| Taurus, et alternum Castora fugit hiems; | |
| Ridet ager, vestitur humus, vestitur et arbor, | |
| Ismarium paelex Attica plorat Ityn. | |
| Quos, Faustine, dies, qualem tibi Roma Ravennam | 5 |
| Abstulit! o soles, o tunicata quies! | |
| O nemus, o fontes solidumque madentis harenae | |
| Litus et aequoreis splendidus Anxur aquis, | |
| Et non unius spectator lectulus undae, | |
| Qui videt hinc puppes fluminis, inde maris! | 10 |
| Sed nec Marcelli Pompeianumque, nec illic | |
| Sunt triplices thermae, nec fora iuncta quater, | |
| Nec Capitolini summum penetrale Tonantis, | |
| Quaeque nitent caelo proxima templa suo. | |
| Dicere te lassum quotiens ego credo Quirino: | 15 |
| 'Quae tua sunt, tibi habe: quae mea, redde mihi.' |