| LV | |
| Oramus, si forte non molestumst, | 55.1 |
| demonstres ubi sint tuae latebrae. | |
| te in campo quaesivimus minore, | |
| te in circo, te in omnibus sacellis, | |
| te in templo summi Iovis sacrato. | 5 |
| in Magni simul ambulatione | |
| femellas omnes, amice, prendi; | |
| quas vultu video tamen serenas. | |
| 'aufertis' sic usque flagitabam | |
| 'Camerium mihi, pessimae puellae?' | 10 |
| 'en,' inquit quaedam, sinum reducens, | |
| 'en hic in roseis latet papillis!' | |
| sed te iam ferre Herculi labos est: | |
| <nec te prendere nunc, amice, possim,> | 13a |
| non custos si fingar ille Cretum, | 13b(58.6) |
| non Ladas ego pinnipesve Perseus, | 13c(58.8) |
| non si Pegaseo ferar volatu, | 13d(58.7) |
| non Rhesi niveae citaeque bigae; | 13e(58.9) |
| adde huc plumipedas volatilesque, | 13f(58.10) |
| ventorumque simul require cursum, | 13g(58.11) |
| quos iunctos, Cameri, mihi dicares: | 13h(58.12) |
| defessus tamen omnibus medullis | 13i(58.13) |
| et multis languoribus peresus | 13j(58.14) |
| essem te mihi, amice, quaeritando. | 13k(58.15) |
| tanto te in fastu negas, amice? | 14 |
| dic nobis ubi sis futurus, ede | 15 |
| audacter, committe, crede luci. | |
| num te lacteolae tenent puellae? | |
| si linguam clauso tenes in ore, | |
| fructus proicies amoris omnes: | |
| verbosa gaudet Venus loquella. | 20 |
| vel, si vis, licet obseres palatum, | |
| dum nostri sis particeps amoris. |