FRAGMENTA
FRAGMENTVM II
Vna uia est Solis, bis senis lucida signis. 2.1
hac rapitur Phoebe, per idem Cythereius ignis
fertur iter, per idem cristatus uertice Mauors
Mercuriusque celer, regno caelique uerendus
Iuppiter et tristi Saturnus lumine tardus. 5
omnibus his gemini motus, quorum alter ab ipsis
nascitur et proprios ostendit sidere nisus
(tum mundum subeunt lento pede), concitus alter
inuitos rapit et caeli circumrotat orbem.
annua Sol medius designat tempora, Phoebe 10
menstrua, namque anno Solem remeare uidebis,
mouerit unde suos currus per signa uolantis.
hoc peragit spatium breuiore citatior orbe
mensem expleturis Phoebe contenta diebus.
annuus est Veneri cursus neque tardior illa 15
Mercurius, bimos Gradiuus perficit orbis.
per duodena pater superum dum signa feretur,
bis senos Phoebus iam tum compleuerit annos
* * * 18a
cursus inaequalis cunctis: nunc igne citato 19
festinare putes, nunc pigro sidere sumpto * * * 20
FRAGMENTA III et IV
Grandine permixtos Aries niuibusque caducis 3(3+4).1
uicina aspergit tristis supra iuga nimbos.
Taurus portat aquas et uentos excitat acres;
fulmina tum crebro iaculatur Iuppiter et tunc
intonat emissis uiolentior ignibus aether. 5
at Geminis leuiter perstringunt caerula uenti,
rarus et in terras caelo demittitur umor.
omnia mitescunt tranquillo sidere Cancri.
siccus erit Leo, praecipue cui pectora feruent.
Virgo refert pluuias et permouet aera uentis. 10
lenius est Librae signum; uix rorat in illo.
Scorpios assidue caelo minitabitur ignis
atque truces uentos; densa niue saepe rigebunt. 14
rara Sagittifero descendunt flamina terris; 15
lentior in pluuias, magis inuenit arua quieta. 13
Aegoceros alias parcit, sed frigora durat, 16
instabilita gelu falli uestigia passus.
Qui fundit latices caelo quoque permouet imbris.
omnia miscentur cum Piscibus; aspera uentis
aequora turbatos uoluunt ad sidera fluctus; 20
imbribus incumbit caelum solemque recondit;
grandine pulsatur tellus, niue condita dura est.
  Haec ut quisque deus possedit numine signa
adiungunt proprias uires. torpere uidentur
omnia Saturno; raros ille exprimit ignis 25
et siccas hiemes astrictis perficit undis.
grandine durantur pluuiae, niue grando putrescit
et rigor accedit uentis. lentissimus ille:
Iuppiter est illo laetus magis. hic ubi Solis 4(3+4).1
uitauit flammas proprio bene lucidus ore
* * * 2a
commissas Cereri fruges spectabis in herbis 3
pomaque purpureo primum nascentia flore;
nec pecus in fetu fallet, noua turba repente 5
mugiet e stabulis; alto balabit ouili.
idem, ne tellus nimium siccata tepore
destituat sata, cum tetigit fera cornua Tauri
dat pluuias, sorbetque datas cum Pliada fugit
atque adiit Geminos. Cancro placidissimus idem 10
dat modicas uires, rapidos et temperat aestus.
et Leo terribilis sub te, pater, ipse repellit
instantis morbos et Ditis limina claudit.
incipis agricolis in Virgine soluere uota.
iam tum maturae segetes et spicea pendet 15
ante larem primum perfecta messe corona.
Libra tumescentis musto bene percoquit uuas.
Scorpion ingrediens tua, Liber, munera condit;
iamque Sagittiferum scandens sua frigora reddit
nunquam laetae hiemi, modice tamen in Capricorno. 20
Hydrochoon Piscesque agitat saeuissimus idem.
si statuit currus quocumque in sidere fessos,
Lanigero tonat et Poeni per terga Leonis
omniaque hibernis permiscet mensibus astra.
  At cum Phoebeos Mauors effugerit ignes, 25
siue Aries Geminique deum siue acre Leonis
sidus et aequatae librato pondere Chelae
aut arcu pollens aut imbris fusor habebit,
spissatis caecus nebulis hebetabitur aer
nullaque praecipites agitabunt aequora uenti. 30
his idem lentos signis cum supprimet ignis
Belliger et pigra cursus statione tenebit,
tum crebro magnus tonitru pulsabitur aether,
tum resoluta dabit nimbos cum grandine nubes;
sed magis, hibernae steterit cum sidere partis, 35
ecfundet totas uiolento numine uires.
at modicos imbres, proni cum cornua Tauri
frugiferamque Deam uel brumalem Capricornum
attigerit, liquido non saeuus ab aethere fundet.
inuectus Cancro, terras cum letifer ortu 40
Sirius afflauit, nocituros temperat aestus.
Scorpios at rimans qua tollit acumina caudae
frigidaque extremi iam claudunt sidera Pisces,
Martia non illos turbabit stella neque imbre
aut ulla condet nitidos caligine soles. 45
sed si forte diem uictus mutauerit aer
et uentos ecfundet aqua, gelidissimus undae
tum rigor et toto Boreas dominabitur orbe.
  At faciles glebas astringit frigore uerno
alma Venus, pecudis claro cum uellere fulsit 50
sub lucem exoriens, eademque, ubi tempore eodem
aetherium uenit Taurum super, imbribus atris
et tonitru crebraque abscondit grandine terras.
temperat in Geminis annum. nec crede sereno,
nubila nec diuturna puta, cum sidere Cancri 55
fulserit ardentis: nil hoc in tempore certum.
flagrantis placide lucens haec temperat aestus
cum posuit sedem Nemeaei finibus astri.
Virgineque et Libra semper pendentia tantum
nubila continua magis in statione manebunt. 60
tum quoque nulla fides caelo, cum Scorpion acrem
stat super, incerta namque omnia lege feruntur.
heu quantis terras tum Iuppiter imbribus omnis
obruet! aut glomerata cadet quam densa per auras
immitis grando! caelum quam saepe sonabit! 65
cum spatium attigerit tendentis spicula signi,
non terris imbres, ponto non flamina deerunt.
et caeli terret sonitus mortalia corda
cum sedem Aegoceri Cythereius attigit ignis.
umidus at gelidos portendit Aquarius imbris, 70
hibernaeque cadunt pluuiae concretaque grando
Piscibus a geminis, ubi prima recurrit in astra.
Phosphoros haec tibi signa dabit cum Aurora * * *
ingrediens Venus alma polum; sed ubi Hesperos ignes
prouocat aetherios et noctem inducere terris 75
incipit, exoriens haec te Cytherea monebit.
uere cauere imbres et fulgura torta memento.
Phrixeae rutilo pecudis radiauerit astro,
nubila erunt mixtusque fragor pluuialibus undis
flaminaque assiduo terris instantia pulsu 80
et dirae caelo deiecti grandinis ictus.
uere magis nitido Tauri cum sidere fulsit
* * * 82a
apponi Geminis eadem inconstantia perstat: 83
cum dederit soles, inducet nubila caelo;
nubila cum fuerint, subitos mirabere soles 85
et modo de uento, gelido modo protinus imbre
lucet et alterna uariabit nube serena.
sin leuis ingressa est spatiosi sidera Cancri,
pacem mundus habet: non ulli corpora soles
pestiferi incendunt, non sidera densa solutos 90
astringunt artus; alieno tempore lenis
omnia pacato tum sidere temperat aer.
at rapidis eadem ne solibus aestuet orbis
efficiet, magni signo conspecta Leonis.
Virgine erunt pluuiae plenique in nube fragores, 95
concaua quos reddunt incluso nubila uento.
detrahet autumno pluuias eademque replebit
nubibus assiduis, Chelae dum frigore primo
extremum autumni superent glaciante teporem.
Scorpios at raris, ne quid caua terra grauetur, 100
horrebit pluuiis. at diris omnia nimbis
continuisque ruet, cum per sinuosa feretur
cornua Centauri rapida distincta sagitta.
Aegoceros imbres et crebro fulmine ruptis
nubibus elidet sonitus tremuloque nitore 105
flagrantis teli mortalia lumina uincet.
haec eadem fundens praedicet Aquarius imbrem.
extremi saeuis maria increbrescere uentis
ostendent Pisces, Veneris cum stella notarit.
  Est quoniam certis ea iam tibi cognita signis, 110
accipe quid moueat mundo Cyllenius ignis
si modo Phoebei flammas effugerit axis,
matutina ferens solitos per sidera cursus.
cum pecudis uillis auratae fulserit astro
uentorumque graues et dirae grandinis irae 115
non intermisso patiendae tempore surgent.
quin aliqua pluuias etiam in regione notabis
adfore; non omni namque est tunc imber in aruo.
ast ubi se Tauri sinuatis cornibus affert,
grandine significat. Geminis tranquilla serenti 120
et placidum nautis spondet caelumque fretumque
* * * 121a
nubilaque atque imbres, aestus ac frigora miscet. 122
certus at ardor erit, quamuis iuuet aura Fauoni,
cum uasti calida radiabit sede Leonis.
templa sed Astraei simul ac possederit ignis, 125
omnia mixta feret, pluuias tantum modo Libra.
Scorpios et pluuias meditabitur; undique uenti,
undique grando uenit, rumpuntur fulmina nimbis.
Centauri attigerit cum iam Cyllenius Arcum,
idem ubi consurget Capricorni sede biformis, 130
aut subitos caelo deducet crebrius imbres
fulminis aut iactu magnum perrumpet Olympon.
nulla serenato Phryx rorans nubila caelo
comparat, at gelidos flatus caelique fragores
non alio melius signo praedicere possis, 135
Piscibus haec eadem quamuis cognoscere detur.
quandoquidem exoritur ignis dum Cyllenaeus
quid faceret primo docui cum lumine Solis,
tempus, et occasu moueat quid, discere, Phoebi:
uer erit hibernis totum exsecrabile nimbis 140
et crebro tonitru; uincet florentia rura
spesque nouae segetis quatientur grandinis ictu
urenturque gelu, magni cum regna Tonantis
ingrediens pecudis conscenderit aurea terga.
hinc et Agenorei stellantia cornua Tauri 145
quidue ferant Gemini, rabido quid sidere Cancer,
si penitus quaeres, Taurum saeuire uidebis
grandine nec contra ferri ratione probanda
aut Cancro aut Geminis. 149a
saeuisque caloribus ardet 150b
hic qua ficta Leo 150a
calidus uestigia seruat. 149b
flatibus at gelidis miscet tranquilla serena 151
spicifera Dea iusta manu, nec Libra tenenti
dissentit diuae, sed, ut haec, uentura serena
nuntiat; a uentis cessat mare, cessat et aer.
Scorpios in pluuias rarus, sed nubibus atris 155
creber agit nimbos et saeua tonitrua portat,
clara Sagittiferi tetigit cum lumina signi.
Aegocero semper caelo leuis excidit imber;
frigidus at rabidis horrebit Aquarius Euris
brumalesque dabit pluuias atque igne perenni 160
cum sonitu quatiet nubes. si cura sagacem
non frustrata animum certo me limite ducit,
haec eadem tibi signa dabunt non irrita Pisces.
FRAGMENTVM V
Astrorumque globos et sidera maximus Atlas 5.1
protulit in populos, numeris uersutus, et omnes
stellarum motus certa ratione notauit;
quae Pharii Tyriique uiri commenta sequentes
aequora uere nouo * * * 5a
* * * uentos et flamina cuncta
Aeolus in partes diuisi rettulit orbis: 6
quo premeret Boreas, Notus unde attolleret imbres
quaque Eurus Zephyrusque domo procederet undis
et circumpositos armaret in aequora fratres.
FRAGMENTVM VI
Prisc. GL 3.417K
  quidni te diuite lingua, 6.1
Graecia, praecurram potiusque triangula dicam?