| XXXIV | |
| Parcus deorum cultor et infrequens, | 1.34.1 |
| insanientis dum sapientiae | |
| consultus erro, nunc retrorsum | |
| vela dare atque iterare cursus | |
| cogor relictos. namque Diespiter | 5 |
| igni corusco nubila dividens | |
| plerumque, per purum tonantis | |
| egit equos volucremque currum, | |
| quo bruta tellus et vaga flumina, | |
| quo Styx et invisi horrida Taenari | 10 |
| sedes Atlanteusque finis | |
| concutitur. valet ima summis | |
| mutare et insignem attenuat deus | |
| obscura promens: hinc apicem rapax | |
| Fortuna cum stridore acuto | 15 |
| sustulit, hic posuisse gaudet. |