| XV | |
| Vxor pauperis Ibyci, | 3.15.1 |
| tandem nequitiae fige modum tuae | |
| famosisque laboribus; | |
| maturo propior desine funeri | |
| inter ludere virgines | 5 |
| et stellis nebulam spargere candidis. | |
| non, siquid Pholoen satis, | |
| et te, Chlori, decet: filia rectius | |
| expugnat iuvenum domos, | |
| pulso Thyias uti concita tympano. | 10 |
| illam cogit amor Nothi | |
| lascivae similem ludere capreae: | |
| te lanae prope nobilem | |
| tonsae Luceriam, non citharae decent | |
| nec flos purpureus rosae | 15 |
| nec poti vetulam faece tenus cadi. |