XXVI
Vixi puellis nuper idoneus 3.26.1
et militavi non sine gloria:
  nunc arma defunctumque bello
    barbiton hic paries habebit,
laevom marinae qui Veneris latus 5
custodit: hic, hic ponite lucida
  funalia et vectis et arcus
    oppositis foribus minacis.
o quae beatam diva tenes Cyprum et
Memphin carentem Sithonia nive, 10
  regina, sublimi flagello
    tange Chloen semel arrogantem.