| Quae uinci potuit regia carmine, | 590 |
| haec uinci poterit regia uiribus. | |
| Hercvles O lucis almae rector et caeli decus, | |
| qui alterna curru spatia flammifero ambiens | |
| inlustre laetis exeris terris caput, | |
| da, Phoebe, ueniam, si quid inlicitum tui | 595 |
| uidere uultus: iussus in lucem extuli | |
| arcana mundi. tuque, caelestum arbiter | |
| parensque, uisus fulmine opposito tege; | |
| et tu, secundo maria qui sceptro regis, | |
| imas pete undas. quisquis ex alto aspicit | 600 |
| terrena, facie pollui metuens noua, | |
| aciem reflectat oraque in caelum erigat | |
| portenta fugiens: hoc nefas cernant duo, | |
| qui aduexit et quae iussit. in poenas meas | |
| atque in labores non satis terrae patent | 605 |
| Iunonis odio: uidi inaccessa omnibus, | |
| ignota Phoebo quaeque deterior polus | |
| obscura diro spatia concessit Ioui; | |
| et, si placerent tertiae sortis loca, | |
| regnare potui: noctis aeternae chaos | 610 |
| et nocte quiddam grauius et tristes deos | |
| et fata uici. morte contempta redi: | |
| quid restat aliud? uidi et ostendi inferos: | |
| da si quid ultra est, iam diu pateris manus | |
| cessare nostras, Iuno: quae uinci iubes? | 615 |
| Sed templa quare miles infestus tenet | |
| limenque sacrum terror armorum obsidet? | |
| Amphitryon Vtrumne uisus uota decipiunt meos, | |
| an ille domitor orbis et Graium decus | |
| tristi silentem nubilo liquit domum? | 620 |
| estne ille natus? membra laetitia stupent. | |
| O nate, certa at sera Thebarum salus, | |
| teneone in auras editum an uana fruor | |
| deceptus umbra? tune es? agnosco toros | |
| umerosque et alto nobile in trunco caput. | 625 |
| He. Vnde iste, genitor, squalor et lugubribus | |
| amicta coniunx? unde tam foedo obsiti | |
| paedore nati? quae domum clades grauat? | |
| Am. Socer est peremptus, regna possedit Lycus, | |
| natos parentem coniugem leto petit. | 630 |
| He. Ingrata tellus, nemo ad Herculeae domus | |
| auxilia uenit? uidit hoc tantum nefas | |
| defensus orbis?—cur diem questu tero? | |
| mactetur hostis, hanc ferat uirtus notam | |
| fiatque summus hostis Alcidae Lycus. | 635 |
| ad hauriendum sanguinem inimicum feror; | |
| Theseu, resiste, ne qua uis subita ingruat. | |
| me bella poscunt, differ amplexus, parens, | |
| coniunxque differ. nuntiet Diti Lycus | |
| me iam redisse. Thesevs Flebilem ex oculis fuga, | 640 |
| regina, uultum, tuque nato sospite | |
| lacrimas cadentes reprime: si noui Herculem, | |
| Lycus Creonti debitas poenas dabit. | |
| lentum est dabit: dat; hoc quoque est lentum: dedit. | |
| Am. Votum secundet qui potest nostrum deus | 645 |
| rebusque lassis adsit. O magni comes | |
| magnanime nati, pande uirtutum ordinem, | |
| quam longa maestos ducat ad manes uia, | |
| ut uincla tulerit dura Tartareus canis. | |
| Th. Memorare cogis acta securae quoque | 650 |
| horrenda menti. uix adhuc certa est fides | |
| uitalis aurae, torpet acies luminum | |
| hebetesque uisus uix diem insuetum ferunt. | |
| Am. Peruince, Theseu, quidquid alto in pectore | |
| remanet pauoris neue te fructu optimo | 655 |
| frauda laborum: quae fuit durum pati, | |
| meminisse dulce est. fare casus horridos. | |
| Th. Fas omne mundi teque dominantem precor | |
| regno capaci teque quam toto inrita | |
| quaesiuit orbe mater, ut iura abdita | 660 |
| et operta terris liceat impune eloqui. |