| Spartana tellus nobile attollit iugum, | 662 |
| densis ubi aequor Taenarus siluis premit; | |
| hic ora soluit Ditis inuisi domus | |
| hiatque rupes alta et immenso specu | 665 |
| ingens uorago faucibus uastis patet | |
| latumque pandit omnibus populis iter. | |
| non caeca tenebris incipit primo uia; | |
| tenuis relictae lucis a tergo nitor | |
| fulgorque dubius solis adflicti cadit | 670 |
| et ludit aciem: nocte sic mixta solet | |
| praebere lumen primus aut serus dies. | |
| hinc ampla uacuis spatia laxantur locis, | |
| in quae omne mersum pergat humanum genus. | |
| nec ire labor est; ipsa deducit uia: | 675 |
| ut saepe puppes aestus inuitas rapit, | |
| sic pronus aer urguet atque auidum chaos, | |
| gradumque retro flectere haut umquam sinunt | |
| umbrae tenaces. Intus immenso sinu | |
| placido quieta labitur Lethe uado | 680 |
| demitque curas, neue remeandi amplius | |
| pateat facultas, flexibus multis grauem | |
| inuoluit amnem: qualis incertis uagus | |
| Maeander undis ludit et cedit sibi | |
| instatque dubius litus an fontem petat. | 685 |
| palus inertis foeda Cocyti iacet; | |
| hic uultur, illic luctifer bubo gemit | |
| omenque triste resonat infaustae strigis. | |
| horrent opaca fronde nigrantes comae | |
| taxo imminente, quam tenet segnis Sopor, | 690 |
| Famesque maesta tabido rictu iacet | |
| Pudorque serus conscios uultus tegit. | |
| Metus Pauorque, Funus et frendens Dolor | |
| aterque Luctus sequitur et Morbus tremens | |
| et cincta ferro Bella; in extremo abdita | 695 |
| iners Senectus adiuuat baculo gradum. | |
| Am. Estne aliqua tellus Cereris aut Bacchi ferax? | |
| Th. Non prata uiridi laeta facie germinant | |
| nec adulta leni fluctuat Zephyro seges; | |
| non ulla ramos silua pomiferos habet: | 700 |
| sterilis profundi uastitas squalet soli | |
| et foeda tellus torpet aeterno situ. | |
| [rerumque maestus finis et mundi ultima] | |
| immotus aer haeret et pigro sedet | |
| nox atra mundo: cuncta maerore horrida | 705 |
| ipsaque morte peior est mortis locus. | |
| Am. Quid ille opaca qui regit sceptro loca? | |
| qua sede positus temperat populos leues? | |
| Th. Est in recessu Tartari obscuro locus, | |
| quem grauibus umbris spissa caligo alligat. | 710 |
| a fonte discors manat hinc uno latex, | |
| alter quieto similis (hunc iurant dei) | |
| tacente sacram deuehens fluuio Styga; | |
| at hic tumultu rapitur ingenti ferox | |
| et saxa fluctu uoluit Acheron inuius | 715 |
| renauigari. cingitur duplici uado | |
| aduersa Ditis regia, atque ingens domus | |
| umbrante luco tegitur. hic uasto specu | |
| pendent tyranni limina, hoc umbris iter, | |
| haec porta regni. campus hanc circa iacet, | 720 |
| in quo superbo digerit uultu sedens | |
| animas recentes. dira maiestas deo, | |
| frons torua, fratrum quae tamen specimen gerat | |
| gentisque tantae, uultus est illi Iouis, | |
| sed fulminantis: magna pars regni trucis | 725 |
| est ipse dominus, cuius aspectus timet | |
| quidquid timetur. Am. Verane est fama inferis | |
| tam sera reddi iura et oblitos sui | |
| sceleris nocentes debitas poenas dare? | |
| quis iste ueri rector atque aequi arbiter? | 730 |
| Th. Non unus alta sede quaesitor sedens | |
| iudicia trepidis sera sortitur reis. | |
| aditur illo Gnosius Minos foro, | |
| Rhadamanthus illo, Thetidis hoc audit socer. | |
| quod quisque fecit, patitur; auctorem scelus | 735 |
| repetit suoque premitur exemplo nocens: | |
| uidi cruentos carcere includi duces | |
| et impotentis terga plebeia manu | |
| scindi tyranni. quisquis est placide potens | |
| dominusque uitae seruat innocuas manus | 740 |
| et incruentum mitis imperium regit | |
| animoque parcit, longa permensus diu | |
| felicis aeui spatia uel caelum petit | |
| uel laeta felix nemoris Elysii loca, | |
| iudex futurus. sanguine humano abstine | 745 |
| quicumque regnas: scelera taxantur modo | |
| maiore uestra. Am. Certus inclusos tenet | |
| locus nocentes? utque fert fama, impios | |
| supplicia uinclis saeua perpetuis domant? | |
| Th. Rapitur uolucri tortus Ixion rota; | 750 |
| ceruice saxum grande Sisyphia sedet; | |
| in amne medio faucibus siccis senex | |
| sectatur undas, alluit mentum latex, | |
| fidemque cum iam saepe decepto dedit, | |
| perit unda in ore; poma destituunt famem. | 755 |
| praebet uolucri Tityos aeternas dapes | |
| urnasque frustra Danaides plenas gerunt; | |
| errant furentes impiae Cadmeides | |
| terretque mensas auida Phineas auis. | |
| Am. Nunc ede nati nobilem pugnam mei. | 760 |
| patrui uolentis munus an spolium refert? | |
| Th. Ferale tardis imminet saxum uadis, | |
| stupente ubi unda segne torpescit fretum. | |
| hunc seruat amnem cultu et aspectu horridus | |
| pauidosque manes squalidus gestat senex. | 765 |
| impexa pendet barba, deformem sinum | |
| nodus coercet, concauae lucent genae; | |
| regit ipse longo portitor conto ratem. | |
| hic onere uacuus litori puppem applicans | |
| repetebat umbras; poscit Alcides uiam | 770 |
| cedente turba; dirus exclamat Charon: | |
| 'quo pergis, audax? siste properantem gradum.' | |
| non passus ullas natus Alcmena moras | |
| ipso coactum nauitam conto domat | |
| scanditque puppem. cumba populorum capax | 775 |
| succubuit uni; sidit et grauior ratis | |
| utrimque Lethen latere titubanti bibit. | |
| tunc uicta trepidant monstra, Centauri truces | |
| Lapithaeque multo in bella succensi mero; | |
| Stygiae paludis ultimos quaerens sinus | 780 |
| fecunda mergit capita Lernaeus labor. |