| V.i | |
| Psevdolvs Quid hóc? sicine hóc fit, pedés? statin án non? | 1246 |
| an íd voltis, út me hinc iacéntem aliquis tóllat? | |
| nam hércle si cécidero, véstrum erit flagítium. | |
| pérgitin pérgere? ah, sérviendúm mihi | |
| hodie ést; magnum hoc vitiúm vino est: | 1250 |
| pedés captat prímum, luctátor dolósust. | |
| profécto edepol égo nunc probe habeo madúlsam: | |
| ita víctu excurato, íta magnis mundítiis <et> dis dígnis, | |
| itaque ín loco festivó sumus festíve accepti. | |
| quid opúst me multas agere ámbages? hoc | 1255 |
| est hómini quam ob rem vítam amet, | |
| hic ómnes voluptatés, in hoc omnés venustatés sunt: | |
| deis próximum esse árbitror. | |
| nam úbi amans complexúst amantem, úbi ad labra labélla adiungit, | |
| úbi alter alterúm bilingui mánifesto inter sé prehendunt, | 1260 |
| ubi mámmam mammicula ópprimit aut, si lúbet, corpora condúplicantur, | |
| manu cándida cantharum dúlciferum propínat amicissíma amico: | |
| ibi iám neque esse alium alii ódiosum | |
| nec mólestum nec sermónibus morologís uti, | |
| unguénta atque odóres, lemníscos, coróllas | 1265 |
| darí dapsilés, non ením parce prómi | |
| (victúm ceterum ne quís me roget): | |
| hóc ego modo átque erus minor húnc diem súmpsimus prothyme, | |
| póstquam opus meum ómne ut volui pérpetravi hóstibus fugatis. | 1269-1270 |
| illós accubántis, potántis, amántis | 1271 |
| cum scórtis relíqui, et meúm scortum ibídem, | |
| suó cordi atque ánimo opsequéntes. sed póstquam | 1272a |
| exúrrexi, oránt med ut sáltem. | 1273 |
| ad hunc me modum intuli illis satis facete, | |
| nimis ex discipulina, quippe ego qui | 1274a |
| probe Ionica perdidici. sed palliolatim amictus | 1275 |
| sic haec incessi ludibundus. | 1275a |
| plaudúnt <et> 'parúm' clamitánt mi, ut revértar. | 1276 |
| óccepi dénuo, hóc modo: nólui | |
| ídem; amicaé dabam mé meae, | 1277a |
| út me amarét: ubi círcumvortór, cado: | 1278 |
| id fúit naenia lúdo. | 1278a |
| ítaque dum enitór, prox, iam paene ínquinavi pállium. | 1279 |
| nímiae tum volúptati edepol | 1280 |
| fúi ob casúm. datur cántharus: bibi. | 1280a |
| commúto ilicó pallium, íllud posívi; | 1281 |
| inde húc exií, crapulám dum amovérem. | |
| núnc ab ero ad erum méum maiorem vénio foedus cómmemoratum. | |
| áperite, aperite, heús, Simoni mé adesse aliquis núntiate. |