I.i
Bacchis. Quíd si hoc potis est út tu taceas, égo loquar? Soror. Lepidé, licet. 35
Bacch. Vbi me fugiet memoria, ibi tu facito ut subvenias, soror.
Sor. Pol magis metuo, ne defuerit mi in monendo oratio.
Bacch. Pol ego metuo, lusciniolae ne defuerit cantio.
sequere hac. Pistoclervs. Quid agunt duae germanae meretrices cognomines?
quid in consilio consuluistis? Bacch. Bene. Pist. Pol haud meretricium est. 40
Bacch. Miserius nihil est quam mulier. Pist. Quid esse dices dignius?
Bacch. Haec ita me orat, sibi qui caveat aliquem ut hominem reperiam,
ut istunc militem—ut, ubi emeritum sibi sit, se revehat domum.
id, amabo te, huic caveas. Pist. Quid isti caveam? B. Vt revehatur domum,
ubi ei dediderit operas, ne hanc ille habeat pro ancilla sibi; 45
nam si haec habeat aurum quod illi renumeret, faciat lubens.
P. Vbi nunc is homost? B. Iam hic credo aderit. sed hoc idem apud nos rectius
poteris agere; atque is dum veniat, sedens ibi opperibere.
eadem biberis, eadem dedero tibi, ubi biberis, savium.
P. Viscus merus vostrast blanditia. B. Quid iam? P. Quia enim intellego, 50
duae unum éxpetitis palumbem, † perii harundo alas verberat.
non ego istúc facinus mihi, mulier, conducibile esse arbitror.
Bacch. Quí, amabo? Pist. Quia, Bacchis, bacchas metuo et bacchanal tuom.
Bacch. Quid est? quid metuis? ne tibi lectus malitiam apud me suadeat?
Pist. Magis illectum tuom quam lectum metuo. mala tu es bestia. 55
nam huic aetati non conducit, mulier, latebrosus locus.
Bacch. Egomet, apud me <si> quid stulte facere cupias, prohibeam.
sed ego apud me te esse ob eam rem, miles cum veniat, volo,
quia, cum tu aderis, huic mihique haud faciet quisquam iniuriam:
tu prohibebis, et eadem opera tuo sodali operam dabis; 60
et ille adveniens tuam med esse amicam suspicabitur.
quid, amabo, opticuisti? Pist. Quia istaec lepida sunt memoratui:
eadem in usu atque ubi periclum facias, aculeata sunt,
animum fodicant, bona distimulant, facta et famam sauciant.
Sor. Quid ab hac metuis? Pist. Quid ego metuam rogitas? adulescens homo 65
penetrem me huius modi in palaestram, ubi damnis desudascitur?
[ubi pro disco damnum capiam, pro cursura dedecus?]
Bacch. Lepide memoras. Pist. Vbi ego capiam pro machaera turturem,
[ubique imponat in manum alius mihi pro cestu cantharum]
pro galea scaphium, pro insigni sit corolla plectilis, 70
pro hasta talos, pro lorica malacum capiam pallium,
ubi mihi pró equo lectus detur, scortum pro scuto accubet?
apage a me, apage. B. Ah, nimium ferus es. P. Mihi sum. B. Malacissandus es.
equidem tibi do hanc operam. Pist. Ah, nimium pretiosa es operaria.
Bacch. Simulato me amare. Pist. Vtrum égo istuc iócon adsimulem an serio? 75
Bacch. Heia, hoc agere meliust. miles quom huc adveniat, te volo
me amplexari. Pist. Quid eo mi opus est? Bacch. Vt ille te videat volo.
scio quid ago. Pist. Et pol égo scio quid metuo. sed quid ais? B. Quid est?
Pist. Quid si apud te eveniát desubito prandium aut potatio
forte aut cena, ut solet in istis fieri conciliabulis, 80
ubi ego tum accumbam? Bacch. Ápud me, mi anime, ut lepidus cum lepida accubet.
locus hic apud nos, quamvis subito venias, semper liber est.
ubi tu lepide vóles esse tibi, méa rosa, mihi dicito
'dato qui bene sit': ego ubi bene sit tibi locum lepidum dabo.
Pist. Rapidus fluvius est hic, non hac temere transiri potest. 85
Bacch. Atque ecastor apud hunc fluvium áliquid perdundumst tibi.
manum da et sequere. P. Aha, minime. B. Quid ita? P. Quia istoc in lecebrosius
fieri nil potest: nox mulier vinum homini adulescentulo.
Bacch. Age igitur, equidem pol nihili facio nisi causa tua.
ille quidem hanc abducet; tú nullus ádfueris, si non lubet. 90
Pist. Sumne autem nihili, qui nequeam ingenio moderari meo?
B. Quid est quod metuas? P. Nihil est, nugae. mulier, tibi me emancupo:
tuos sum, tibi dedo operam. B. Lepidu's. nunc ego te facere hoc volo.
ego sorori meae cenam hodie dare volo viaticam:
eo tibi argentum iubebo iam intus ecferri foras; 95
tu facito opsonatum nobis sit opulentum opsonium.
Pist. Ego opsonabo, nam id flagitium meum sit, mea te gratia
et operam dare mi ét ad eam operam facere sumptum de tuo.
Bacch. At ego nolo dare te quicquam. P. Sine. B. Sino equidem, si lubet.
propera, amabo. Pist. Prius hic adero quam te amare desinam.— 100
Sor. Bene me accipies advenientem, mea soror. Bacch. Quid ita, obsecro?
Sor. Quia piscatus meo quidem animo hic tibi hodie evenit bonus.
Bacch. Meus ille quidemst. tibi nunc operam dabo de Mnesilocho, soror,
ut hic accipias potius aurum, quam hinc eas cum milite.
Sor. Cupio. Bacch. Dabitur opera. aqua calet: eamus hinc intro, ut laves. 105
nám uti navi vecta es, credo timida es. Sor. Aliquantum, soror.
[simul huic nescio cui, turbare qui huc it, decedamus * ]
Bacch. Sequere hac igitur me intro in lectum, ut sedes lassitudinem.