| V.iv | |
| Chal. Úbi tu es, qui cólere mores Mássilienses póstulas? | 963 |
| nunc tu si vis subigitare me, probast occasio. | |
| redi sis in cubiculum; periisti hercle. age, accede huc modo. | 965 |
| nunc ego tecum aequom arbitrum extra considium captavero. | |
| Lys. Perii, fusti defloccabit iam illic homo lumbos meos. | |
| hac iter faciundumst, nam illac lumbifragiumst obviam. | |
| Cleos. Iubeo te salvere, amator. Lys. Ecce autem uxor obviamst: | |
| [nunc ego intér sacrum saxumque sum nec quo fugiam scio.] | 970 |
| hac lupi, hac canes: lupina scaeva fusti rem gerit; | |
| hercle opinor permutabo ego illuc nunc verbum vetus: | |
| hac ibo, caninam scaevam spero meliorem fore. | |
| Myrr. Quid agis, dismarite? Cleos. Mi vir, unde hoc ornatu advenis? | |
| quid fecisti scipione aut quod habuisti pallium? | 975 |
| Myrr. In adulterio, dum moechissat Casinam, credo perdidit. | |
| Lys. Occidi. Ch. Etiamne imus cubitum? Casina sum. L. I in malam crucem. | |
| Chal. Non amas me? Cleos. Quin responde, tuo quid factum est pallio? | |
| Lys. Bacchae hercle, uxor—Cleos. Bacchae? Lys. Bacchae hercle, uxor—Myrr. Nugatur sciens, | |
| nam ecastor nunc Bacchae nullae ludunt. Lys. Oblitus fui, | 980 |
| sed tamén Bacchae—Cleos. Quid, Bacchae? Lys. Sin id fieri non potest— | |
| Cleos. Times ecastor. Lys. Egone? Cl. Mentire hercle. nam palles male. | |
| ṇ .......... quid me ṿẹ .... ụṣ ..... am me rog̣ạs? | |
| * ṃạḷẹ ṛ * mihi | |
| * g̣ṛatulor. | 985 |
| * q̣ụ * ṣẹṇex | |
| ḥọ * ọṇ * ụ | |
| * ụṇc̣ cạsiṇụst | – | | |
| quị ḥịc̣ * lem frus ..... ṛạm .. ḍịs | 989-990 |
| (Ol.) qui étiam me miserum famosum fecit flagitiis suis. | 991 |
| Lys. Non taces? Ol. Non herle vero taceo. nam tu maxumo | |
| me opsecravisti opere, Casinam ut poscerem uxorem mihi | |
| túi amoris causa. Lys. Ego istuc feci? Ol. Immo Hector Ilius | 994-995 |
| te quidem oppresset. Lys. Feci égo istaec dicta quae vos dicitis? | 996 |
| Cleos. Rogitas etiam? Lys. Si quidem hercle feci, feci nequiter. | |
| Cleos. Redi modo huc intro: monebo, si qui meministi minus. | |
| Lys. Hercle, opinor, potius vobis credam quod vos dicitis. | |
| sed, uxor, da viro <tuo> hanc veniam. Myrrhina, ora Cleostratam; | 1000 |
| si umquam posthac aut amasso Casinam aut occepso modo, | |
| ne ut eam amasso, sí ego umquam adeo posthac tale admisero | |
| nulla causast, quin pendentem me, uxor, virgis verberes. | |
| Myrr. Censeo ecastor veniam hanc dandam. Cleos. Faciam ut iubes. | |
| propter eam rem hanc tibi nunc veniam minus gravate prospero, | 1005 |
| hanc ex longa longiorem ne faciamus fabulam. | |
| Lys. Non irata es? Cleos. Non sum irata. Lys. Tuaen fidei credo? CL. Meae. | |
| Lys. Lepidiorem uxorem nemo quisquam quam ego habeo hanc habet. | |
| Cleos. Age tu, redde huic scipionem et pallium. Chal. Tene, si lubet. | |
| mihi quidem edepol insignite factast magna iniuria: | 1010 |
| duobus nupsi, neuter fecit quod novae nuptae solet. | |
| Spectatores, quod futurumst intus, id memorabimus. | |
| haec Casina huius reperietur filia esse ex proxumo | |
| eaque nubet Euthynico nostro erili filio. | |
| nunc vos aequomst manibus meritis meritam mercedem dare: | 1015 |
| qui faxit, clam uxorem ducet semper scortum quod volet; | |
| verum qui non manibus clare, quantum poterit, plauserit, | |
| ei pro scorto supponetur hircus unctus nautea. |