| XLIX | |
| Crinitae Line paedagoge turbae, | 12.49.1 |
| Rerum quem dominum vocat suarum | |
| Et credit cuï Postumilla dives | |
| Gemmas, aurea, vina, concubinos: | |
| Sic te perpetua fide probatum | 5 |
| Nulli non tua praeferat patrona: | |
| Succurras misero, precor, furori | |
| Et serves aliquando neglegenter | |
| Illos qui male cor meum perurunt, | |
| Quos et noctibus et diebus opto | 10 |
| In nostro cupidus sinu videre, | |
| Formosos, niveos, pares, gemellos, | |
| Grandes, non pueros, sed uniones. |