Marcus Valerius Martialis, Epigrammata 12.59.1

LIX
Tantum dat tibi Roma basiorum	12.59.1
Post annos modo quindecim reverso,
Quantum Lesbia non dedit Catullo.
Te vicinia tota, te pilosus
Hircoso premit osculo colonus;	5
Hinc instat tibi textor, inde fullo,
Hinc sutor modo pelle basiata,
Hinc menti dominus periculosi,
Hinc et dexiocholus, inde lippus,
Fellatorque recensque cunnilingus.	10
Iam tanti tibi non fuit redire.