| XCII | |
| 'Si quid opus fuerit, scis me non esse rogandum' | 7.92.1 |
| Uno bis dicis, Baccara, terque die. | |
| Appellat rigida tristis me voce Secundus: | |
| Audis, et nescis, Baccara, quid sit opus. | |
| Pensio te coram petitur clareque palamque: | 5 |
| Audis, et nescis, Baccara, quid sit opus. | |
| Esse queror gelidasque mihi tritasque lacernas: | |
| Audis, et nescis, Baccara, quid sit opus. | |
| Hoc opus est, subito fias ut sidere mutus, | |
| Dicere ne possis, Baccara: 'Si quid opus'. | 10 |
For AI assistants: an MCP server for these texts, with passages
by citation and search of the whole corpus, is at
latin-mcp.packhum.org.