| XXIX | |
| Saecula Nestoreae permensa, Philaeni, senectae, | 9.29.1 |
| Rapta es ad infernas tam cito Ditis aquas? | |
| Euboicae nondum numerabas longa Sibyllae | |
| Tempora: maior erat mensibus illa tribus. | |
| Heu quae lingua silet! non illam mille catastae | 5 |
| Vincebant, nec quae turba Sarapin amat, | |
| Nec matutini cirrata caterva magistri, | |
| Nec quae Strymonio de grege ripa sonat. | |
| Quae nunc Thessalico lunam deducere rhombo, | |
| Quae sciet hos illos vendere lena toros? | 10 |
| Sit tibi terra levis mollique tegaris harena, | |
| Ne tua non possint eruere ossa canes. |