| LVII | |
| Nil est tritius Hedyli lacernis: | 9.57.1 |
| Non ansae veterum Corinthiorum, | |
| Nec crus compede lubricum decenni, | |
| Nec ruptae recutita colla mulae, | |
| Nec quae Flaminiam secant salebrae, | 5 |
| Nec qui litoribus nitent lapilli, | |
| Nec Tusca ligo vinea politus, | |
| Nec pallens toga mortui tribulis, | |
| Nec pigri rota quassa mulionis, | |
| Nec rasum cavea latus visontis, | 10 |
| Nec dens iam senior ferocis apri. | |
| Res una est tamen: ipse non negabit, | |
| Culus tritior Hedyli lacernis. |