| LXXIII | |
| Littera facundi gratum mihi pignus amici | 10.73.1 |
| Pertulit, Ausoniae dona severa togae, | |
| Qua non Fabricius, sed vellet Apicius uti, | |
| Vellet Maecenas Caesarianus eques. | |
| Vilior haec nobis alio mittente fuisset; | 5 |
| Non quacumque manu victima caesa litat: | |
| A te missa venit: possem nisi munus amare, | |
| Marce, tuum, poteram nomen amare meum. | |
| Munere sed plus est et nomine gratius ipso | |
| Officium docti iudiciumque viri. | 10 |