| viii Id. Apr. 58 Thuriis | |
| CICERO ATTICO SAL. | |
| Terentia tibi et saepe et maximas agit gratias. id est mihi | 3.5.1.1 |
| gratissimum. ego vivo miserrimus et maximo dolore conficior. | |
| ad te quid scribam nescio. si enim es Romae, iam me adsequi | |
| non potes; sin es in via, cum eris me adsecutus, coram agemus | |
| quae erunt agenda. tantum te oro ut, quoniam me ipsum | 5 |
| semper amasti, ut eodem amore sis; ego enim idem sum. | |
| inimici mei mea mihi, non me ipsum ademerunt. cura ut | |
| valeas. data viii Id. Apr. Thuri. |