| VIII | |
| Disce, quid Esquilias hac nocte fugarit aquosas, | 4.8.1 |
| cum vicina novis turba cucurrit agris, | |
| turpis in arcana sonuit cum rixa taberna, | 19 |
| si sine me, famae non sine labe meae. | 20 |
| Lanuvium annosi vetus est tutela draconis: | 3 |
| hic tibi tam rarae non perit hora morae. | |
| qua sacer abripitur caeco descensus hiatu, | 5 |
| hac penetrat (virgo, tale iter omne cave!) | |
| ieiuni serpentis honos, cum pabula poscit | |
| annua et ex ima sibila torquet humo. | |
| ille sibi admotas a virgine corripit escas: | 11 |
| virginis in palmis ipsa canistra tremunt. | |
| talia demissae pallent ad sacra puellae, | 9 |
| cum temere anguino raditur ore manus. | 10 |
| si fuerunt castae, redeunt in colla parentum, | 13 |
| clamantque agricolae 'fertilis annus erit.' | |
| huc mea detonsis avectast Cynthia mannis: | 15 |
| causa fuit Iuno, sed mage causa Venus. | |
| Appia, dic quaeso, quantum te teste triumphum | |
| egerit effusis per tua saxa rotis! | |
| spectaclum ipsa sedens primo temone pependit, | 21 |
| ausa per impuros frena movere iocos. | |
| serica nam taceo vulsi carpenta nepotis | |
| atque armillatos colla Molossa canes, | |
| qui dabit immundae venalia fata saginae, | 25 |
| vincet ubi erasas barba pudenda genas. | |
| cum fieret nostro totiens iniuria lecto, | |
| mutato volui castra movere toro. | |
| Phyllis Aventinae quaedamst vicina Dianae, | |
| sobria grata parum: cum bibit, omne decet. | 30 |
| altera Tarpeios est inter Teia lucos, | |
| candida, sed potae non satis unus erit. | |
| his ego constitui noctem lenire vocatis, | |
| et Venere ignota furta novare mea. | |
| unus erat tribus in secreta lectulus herba. | 35 |
| quaeris discubitus? inter utramque fui. | |
| Lygdamus ad cyathos, vitrique aestiva supellex | |
| et Methymnaei grata saliva meri. | |
| Miletus tibicen erat, crotalistria Byblis | |
| (haec facilis spargi munda sine arte rosa), | 40 |
| Magnus et ipse suos breviter concretus in artus | |
| iactabat truncas ad cava buxa manus. | |
| sed neque suppletis constabat flamma lucernis, | |
| reccidit inque suos mensa supina pedes. | |
| me quoque per talos Venerem quaerente secundam | 45 |
| semper damnosi subsiluere canes. | |
| cantabant surdo, nudabant pectora caeco: | |
| Lanuvii ad portas, ei mihi, totus eram; | |
| cum subito rauci sonuerunt cardine postes, | |
| nec levia ad primos murmura facta Lares. | 50 |
| nec mora, cum totas resupinat Cynthia valvas, | |
| non operosa comis, sed furibunda decens. | |
| pocula mi digitos inter cecidere remissos, | |
| palluerunt ipso labra soluta mero. | |
| fulminat illa oculis et quantum femina saevit, | 55 |
| spectaclum capta nec minus urbe fuit. | |
| Phyllidos iratos in vultum conicit ungues: | |
| territa 'vicini,' Teia clamat 'aquam!' | |
| crimina sopitos turbant elata Quirites, | |
| omnis et insana semita voce sonat. | 60 |
| illas direptisque comis tunicisque solutis | |
| excipit obscurae prima taberna viae. | |
| Cynthia gaudet in exuviis victrixque recurrit | |
| et mea perversa sauciat ora manu, | |
| imponitque notam collo morsuque cruentat, | 65 |
| praecipueque oculos, qui meruere, ferit. | |
| atque ubi iam nostris lassavit bracchia plagis, | |
| Lygdamus, ad plutei fulcra sinistra latens, | |
| eruitur geniumque meum prostratus adorat. | |
| Lygdame, nil potui: tecum ego captus eram. | 70 |
| supplicibus palmis tum demum ad foedera veni, | |
| cum vix tangendos praebuit illa pedes, | |
| atque ait 'admissae si vis me ignoscere culpae, | |
| accipe, quae nostrae formula legis erit. | |
| tu neque Pompeia spatiabere cultus in umbra, | 75 |
| nec cum lascivum sternet harena Forum. | |
| colla cave inflectas ad summum obliqua theatrum, | |
| aut lectica tuae se det aperta morae. | |
| Lygdamus in primis, omnis mihi causa querelae, | |
| veneat et pedibus vincula bina trahat.' | 80 |
| indixit legem: respondi ego 'legibus utar.' | |
| riserat imperio facta superba dato. | |
| dein quemcumque locum externae tetigere puellae, | |
| suffiit, ac pura limina tergit aqua, | |
| imperat et totas iterum mutare lucernas, | 85 |
| terque meum tetigit sulpuris igne caput. | |
| atque ita mutato per singula pallia lecto | |
| despondi, et noto solvimus arma toro. |