| XXXIIIB | |
| Non audis et verba sinis mea ludere, cum iam | 2.33b.23 |
| flectant Icarii sidera tarda boves. | |
| lenta bibis: mediae nequeunt te frangere noctes? | 25 |
| an nondumst talos mittere lassa manus? | |
| ah pereat, quicumque meracas repperit uvas | |
| corrupitque bonas nectare primus aquas! | |
| Icare, Cecropiis merito iugulate colonis, | |
| pampineus nosti quam sit amarus odor! | 30 |
| tuque o Eurytion vino Centaure peristi, | |
| nec non Ismario tu, Polypheme, mero. | |
| vino forma perit, vino corrumpitur aetas, | |
| vino saepe suum nescit amica virum. | |
| me miserum, ut multo nihil est mutata Lyaeo! | 35 |
| iam bibe: formosa's: nil tibi vina nocent, | |
| cum tua praependent demissae in pocula sertae, | |
| et mea deducta carmina voce legis. | |
| largius effuso madeat tibi mensa Falerno, | |
| spumet et aurato mollius in calice. | 40 |