| XX | |
| Non vides, quanto moveas periclo, | 3.20.1 |
| Pyrrhe, Gaetulae catulos leaenae? | |
| dura post paulo fugies inaudax | |
| proelia raptor, | |
| cum per obstantis iuvenum catervas | 5 |
| ibit insignem repetens Nearchum, | |
| grande certamen, tibi praeda cedat, | |
| maior an illa. | |
| interim, dum tu celeris sagittas | |
| promis, haec dentis acuit timendos, | 10 |
| arbiter pugnae posuisse nudo | |
| sub pede palmam | |
| fertur et leni recreare vento | |
| sparsum odoratis umerum capillis, | |
| qualis aut Nireus fuit aut aquosa | 15 |
| raptus ab Ida. |