| 'Talia multa mihi longum narrata per annum | 14.435 |
| visaque sunt. resides et desuetudine tardi | |
| rursus inire fretum, rursus dare vela iubemur, | |
| ancipitesque vias et iter Titania vastum | |
| dixerat et saevi restare pericula ponti: | |
| pertimui, fateor, nactusque hoc litus adhaesi.' | 440 |
| Finierat Macareus, urnaque Aeneia nutrix | |
| condita marmorea tumulo breve carmen habebat | |
| hic · me · caietam · notae · pietatis · alumnus | |
| ereptam · argolico · quo · debuit · igne · cremavit | |
| solvitur herboso religatus ab aggere funis, | 445 |
| et procul insidias infamataeque relinquunt | |
| tecta deae lucosque petunt, ubi nubilus umbra | |
| in mare cum flava prorumpit Thybris harena; | |
| Faunigenaeque domo potitur nataque Latini, | |
| non sine Marte tamen. bellum cum gente feroci | 450 |
| suscipitur, pactaque furit pro coniuge Turnus. | |
| concurrit Latio Tyrrhenia tota, diuque | |
| ardua sollicitis victoria quaeritur armis. | |
| auget uterque suas externo robore vires, | |
| et multi Rutulos, multi Troiana tuentur | 455 |
| castra, neque Aeneas Euandri ad moenia frustra, | |
| at Venulus frustra profugi Diomedis ad urbem | |
| venerat: ille quidem sub Iapyge maxima Dauno | |
| moenia condiderat dotaliaque arva tenebat; | |
| sed Venulus Turni postquam mandata peregit | 460 |
| auxiliumque petit, vires Aetolius heros | |
| excusat: nec se aut soceri committere pugnae | |
| velle sui populos, aut quos e gente suorum | |
| armet habere ullos, 'neve haec commenta putetis, | |
| admonitu quamquam luctus renoventur amari, | 465 |
| perpetiar memorare tamen. postquam alta cremata est | |
| Ilios, et Danaas paverunt Pergama flammas, | |
| Naryciusque heros, a virgine virgine rapta, | |
| quam meruit poenam solus, digessit in omnes, | |
| spargimur et ventis inimica per aequora rapti | 470 |
| fulmina, noctem, imbres, iram caelique marisque | |
| perpetimur Danai cumulumque Capherea cladis, | |
| neve morer referens tristes ex ordine casus, | |
| Graecia tum potuit Priamo quoque flenda videri. | |
| me tamen armiferae servatum cura Minervae | 475 |
| fluctibus eripuit, patriis sed rursus ab agris | |
| pellor, et antiquo memores de vulnere poenas | |
| exigit alma Venus, tantosque per alta labores | |
| aequora sustinui, tantos terrestribus armis, | |
| ut mihi felices sint illi saepe vocati, | 480 |
| quos communis hiems inportunusque Caphereus | |
| mersit aquis, vellemque horum pars una fuissem. |