Dominare tumidus, spiritus altos gere: 384
sequitur superbos ultor a tergo deus. 385
Thebana noui regna: quid matres loquar
passas et ausas scelera? quid geminum nefas
mixtumque nomen coniugis gnati patris?
quid bina fratrum castra? quid totidem rogos?
riget superbo Tantalis luctu parens 390
maestusque Phrygio manat in Sipylo lapis.
quin ipse toruum subrigens crista caput
Illyrica Cadmus regna permensus fuga
longas reliquit corporis tracti notas.
haec te manent exempla: dominare ut libet, 395
dum solita regni fata te nostri uocent.
Ly. Agedum efferatas rabida uoces amoue
et disce regum imperia ab Alcide pati.
ego rapta quamuis sceptra uictrici geram
dextra regamque cuncta sine legum metu 400
quas arma uincunt, pauca pro causa loquar
nostra. cruento cecidit in bello pater?
cecidere fratres? arma non seruant modum;
nec temperari facile nec reprimi potest
stricti ensis ira; bella delectat cruor. 405
sed ille regno pro suo, nos improba
cupidine acti? quaeritur belli exitus,
non causa. sed nunc pereat omnis memoria:
cum uictor arma posuit, et uictum decet
deponere odia. non ut inflexo genu 410
regnantem adores petimus: hoc ipsum placet
animo ruinas quod capis magno tuas;
es rege coniunx digna: sociemus toros.
Me. Gelidus per artus uadit exanguis tremor.
quod facinus aures pepulit? haut equidem horrui, 415
cum pace rupta bellicus muros fragor
circumsonaret, pertuli intrepide omnia:
thalamos tremesco; capta nunc uideor mihi.—
Grauent catenae corpus et longa fame
mors protrahatur lenta: non uincet fidem 420
uis ulla nostram; moriar, Alcide, tua.
Ly. Animosne mersus inferis coniunx facit?
Me. Inferna tetigit, posset ut supera assequi.
Ly. Telluris illum pondus immensae premit.
Me. Nullo premetur onere, qui caelum tulit. 425
Ly. Cogere. Me. Cogi qui potest nescit mori.
Ly. Effare thalamis quod nouis potius parem
regale munus. Me. Aut tuam mortem aut meam.
Ly. Moriere demens. Me. Coniugi occurram meo.
Ly. Sceptrone nostro famulus est potior tibi? 430
Me. Quot iste famulus tradidit reges neci!
Ly. Cur ergo regi seruit et patitur iugum?
Me. Imperia dura tolle: quid uirtus erit?
Ly. Obici feris monstrisque uirtutem putas?
Me. Virtutis est domare quae cuncti pauent. 435
Ly. Tenebrae sequentem magna Tartareae premunt.
Me. Non est ad astra mollis e terris uia.
Ly. Quo patre genitus caelitum sperat domos?
Am. Miseranda coniunx Herculis magni, sile:
partes meae sunt reddere Alcidae patrem 440
genusque uerum. post tot ingentis uiri
memoranda facta postque pacatum manu
quodcumque Titan ortus et labens uidet,
post monstra tot perdomita, post Phlegram impio
sparsam cruore postque defensos deos 445
nondum liquet de patre? mentimur Iouem?
Iunonis odio crede. Ly. Quid uiolas Iouem?
mortale caelo non potest iungi genus.
Am. Communis ista pluribus causa est deis.
Ly. Famuline fuerant ante quam fierent dei? 450
Am. Pastor Pheraeos Delius pauit greges.
Ly. Sed non per omnes exul errauit plagas.
Am. Quem profuga terra mater errante edidit?
Ly. Num monstra saeua Phoebus aut timuit feras?
Am. Primus sagittas imbuit Phoebi draco. 455
Ly. Quam grauia partus tulerit ignoras mala?
Am. E matris utero fulmine eiectus puer
mox fulminanti proximus patri stetit.
quid? qui gubernat astra, qui nubes quatit,
non latuit infans rupis exesae specu? 460
sollicita tanti pretia natales habent
semperque magno constitit nasci deum.
Ly. Quemcumque miserum uideris, hominem scias.
Am. Quemcumque fortem uideris, miserum neges.
Ly. Fortem uocemus cuius ex umeris leo, 465
donum puellae factus, et claua excidit
fulsitque pictum ueste Sidonia latus?
fortem uocemus cuius horrentes comae
maduere nardo, laude qui notas manus
ad non uirilem tympani mouit sonum, 470
mitra ferocem barbara frontem premens?
Am. Non erubescit Bacchus effusos tener
sparsisse crines nec manu molli leuem
uibrare thyrsum, cum parum forti gradu
auro decorum syrma barbarico trahit: 475
post multa uirtus opera laxari solet.
Ly. Hoc Euryti fatetur euersi domus
pecorumque ritu uirginum oppressi greges;
hoc nulla Iuno, nullus Eurystheus iubet:
ipsius haec sunt opera. Am. Non nosti omnia: 480
ipsius opus est caestibus fractus suis
Eryx et Eryci iunctus Antaeus Libys,
et qui hospitali caede manantes foci
bibere iustum sanguinem Busiridis;
ipsius opus est uulneri et ferro obuius 485
mortem coactus integer Cycnus pati,
nec unus una Geryon uictus manu.
eris inter istos—qui tamen nullo stupro
laesere thalamos. Ly. Quod Ioui hoc regi licet:
Ioui dedisti coniugem, regi dabit; 490
et te magistro non nouum hoc discet nurus,
etiam uiro probante meliorem sequi.
sin copulari pertinax taedis negat,
uel ex coacta nobilem partum feram.
Me. Vmbrae Creontis et penates Labdaci 495
et nuptiales impii Oedipodae faces,
nunc solita nostro fata coniugio date.
nunc nunc, cruentae regis Aegypti nurus,
adeste multo sanguine infectae manus.
dest una numero Danais: explebo nefas. 500
Ly. Coniugia quoniam peruicax nostra abnuis
regemque terres, sceptra quid possint scies.
complectere aras: nullus eripiet deus
te mihi, nec orbe si remolito queat
ad supera uictor lumina Alcides uehi. 505