Thyestes Optata patriae tecta et Argolicas opes 404
miserisque summum ac maximum exulibus bonum, 405
tractum soli natalis et patrios deos
(si sunt tamen di) cerno, Cyclopum sacras
turres, labore maius humano decus,
celebrata iuueni stadia, per quae nobilis
palmam paterno non semel curru tuli. 410
occurret Argos, populus occurret frequens—
sed nempe et Atreus. Repete siluestres fugas
saltusque densos potius et mixtam feris
similemque uitam; clarus hic regni nitor
fulgore non est quod oculos falso auferat: 415
cum quod datur spectabis, et dantem aspice.
modo inter illa, quae putant cuncti aspera,
fortis fui laetusque; nunc contra in metus
reuoluor: animus haeret ac retro cupit
corpus referre, moueo nolentem gradum. 420
  Tantalvs Pigro (quid hoc est?) genitor incessu stupet
uultumque uersat seque in incerto tenet.
Th. Quid, anime, pendes, quidue consilium diu
tam facile torques? rebus incertissimis,
fratri atque regno, credis ac metuis mala 425
iam uicta, iam mansueta et aerumnas fugis
bene collocatas? esse iam miserum iuuat.
reflecte gressum, dum licet, teque eripe.
Ta. Quae causa cogit, genitor, a patria gradum
referre uisa? cur bonis tantis sinum 430
subducis? ira frater abiecta redit
partemque regni reddit et lacerae domus
componit artus teque restituit tibi.
Th. Causam timoris ipse quam ignoro exigis.
nihil timendum uideo, sed timeo tamen. 435
placet ire, pigris membra sed genibus labant,
alioque quam quo nitor abductus feror.
sic concitatam remige et uelo ratem
aestus resistens remigi et uelo refert.
Ta. Euince quidquid obstat et mentem impedit 440
reducemque quanta praemia expectent uide.
pater, potes regnare. Th. Cum possim mori.
Ta. Summa est potestas—Th. Nulla, si cupias nihil.
Ta. Gnatis relinques. Th. Non capit regnum duos.
Ta. Miser esse mauult esse qui felix potest? 445
Th. Mihi crede, falsis magna nominibus placent,
frustra timentur dura. dum excelsus steti,
numquam pauere destiti atque ipsum mei
ferrum timere lateris. o quantum bonum est
obstare nulli, capere securas dapes 450
humi iacentem! scelera non intrant casas,
tutusque mensa capitur angusta scyphus;
uenenum in auro bibitur—expertus loquor:
malam bonae praeferre fortunam licet.
Non uertice alti montis impositam domum 455
et imminentem ciuitas humilis tremit
nec fulget altis splendidum tectis ebur
somnosque non defendit excubitor meos;
non classibus piscamur et retro mare
iacta fugamus mole, nec uentrem improbum 460
alimus tributo gentium; nullus mihi
ultra Getas metatur et Parthos ager;
non ture colimur nec meae excluso Ioue
ornantur arae; nulla culminibus meis
imposita nutat silua, nec fumant manu 465
succensa multa stagna, nec somno dies
Bacchoque nox iungenda peruigili datur:
sed non timemur, tuta sine telo est domus
rebusque paruis magna praestatur quies—
immane regnum est posse sine regno pati. 470
Ta. Nec abnuendum est, si dat imperium deus.
nec appetendum est: frater ut regnes rogat.
Th. Rogat? timendum est. errat hic aliquis dolus.
Ta. Redire pietas unde summota est solet,
reparatque uires iustus amissas amor. 475
Th. Amat Thyesten frater? aetherias prius
perfundet Arctos pontus et Siculi rapax
consistet aestus unda et Ionio seges
matura pelago surget et lucem dabit
nox atra terris, ante cum flammis aquae, 480
cum morte uita, cum mari uentus fidem
foedusque iungent. Ta. Quam tamen fraudem times?
Th. Omnem: timori quem meo statuam modum?
tantum potest quantum odit. Ta. In te quid potest?
Th. Pro me nihil iam metuo: uos facitis mihi 485
Atrea timendum. Ta. Decipi cautus times?
Th. Serum est cauendi tempus in mediis malis.
eatur. unum genitor hoc testor tamen:
ego uos sequor, non duco. Ta. Respiciet deus
bene cogitata. perge non dubio gradu. 490