| XXXV | |
| Artibus his semper cenam, Philomuse, mereris, | 9.35.1 |
| Plurima dum fingis, sed quasi vera refers. | |
| Scis, quid in Arsacia Pacorus deliberet aula, | |
| Rhenanam numeras Sarmaticamque manum, | |
| Verba ducis Daci chartis mandata resignas, | 5 |
| Victricem laurum quam venit ante vides, | |
| Scis, quotiens Phario madeat Iove fusca Syene, | |
| Scis, quota de Libyco litore puppis eat, | |
| Cuius Iuleae capiti nascantur olivae, | |
| Destinet aetherius cui sua serta pater. | 10 |
| Tolle tuas artes; hodie cenabis apud me | |
| Hac lege, ut narres nil, Philomuse, novi. |