| xvii Kal. Mai. 44 (§1) in Formiano | |
| <CICERO ATTICO SAL.> | |
| Postridie Idus Paulum in Caieta vidi. is mihi de Mario et de re | 14.7.1.1 |
| publica aliqua, quaedam sane pessima. a te scilicet nihil; nemo | |
| enim meorum. sed Brutum nostrum audio visum sub Lanuvio. | |
| ubi tandem est futurus? nam cum reliqua tum de hoc scire aveo | |
| omnia. ego e Formiano exiens xvii Kal. ut inde altero die in | 5 |
| Puteolanum scripsi haec. | |
| A Cicerone mihi litterae sane πεπινωμέναι et bene longae. | 2.1 |
| cetera autem vel fingi possunt, πίνος litterarum significat | |
| doctiorem. nunc magno opere a te peto, de quo sum nuper | |
| tecum locutus, ut videas ne quid ei desit. id cum ad officium | |
| nostrum pertinet tum ad existimationem et dignitatem; quod | 5 |
| idem intellexi tibi videri. omnino si ego evolo mense Quintili | |
| in Graeciam, sunt omnia faciliora; sed cum sint ea tempora ut | |
| certi nihil esse possit quid honestum mihi sit, quid liceat, quid | |
| expediat, quaeso, da operam ut illum quam honestissime copio- | |
| sissimeque tueamur. | 10 |
| Haec et cetera quae ad nos pertinebunt, ut soles, cogitabis, ad | |
| meque aut quod ad rem pertineat aut, si nihil erit, quod in | |
| buccam venerit scribes. |