| VI | |
| Sacra facit vates: sint ora faventia sacris, | 4.6.1 |
| et cadat ante meos icta iuvenca focos. | |
| serta Philiteis certet Romana corymbis, | |
| et Cyrenaeas urna ministret aquas. | |
| costum molle date et blandi mihi turis honores, | 5 |
| terque focum circa laneus orbis eat. | |
| spargite me lymphis, carmenque recentibus aris | |
| tibia Mygdoniis libet eburna cadis. | |
| ite procul fraudes, alio sint aere noxae: | |
| pura novum vati laurea mollit iter. | 10 |
| Musa, Palatini referemus Apollinis aedem: | |
| res est, Calliope, digna favore tuo. | |
| Caesaris in nomen ducuntur carmina: Caesar | |
| dum canitur, quaeso, Iuppiter, ipse vaces. | |
| est Phoebi fugiens Athamana ad litora portus, | 15 |
| qua sinus Ioniae murmura condit aquae, | |
| Actia Iuleae Leucas monumenta carinae, | |
| nautarum votis non operosa via. | |
| huc mundi coiere manus: stetit aequore moles | |
| pinea, nec remis aequa favebat avis. | 20 |
| altera classis erat Teucro damnata Quirino, | |
| pilaque femineae turpiter apta manu: | |
| hinc Augusta ratis plenis Iovis omine velis, | |
| signaque iam patriae vincere docta suae. | |
| tandem aciem geminos Nereus lunarat in arcus, | 25 |
| armorum et radiis icta tremebat aqua, | |
| cum Phoebus linquens stantem se vindice Delon | |
| (non tulit iratos mobilis ante Notos) | |
| astitit Augusti puppim super, et nova flamma | |
| luxit in obliquam ter sinuata facem. | 30 |
| non ille attulerat crines in colla solutos | |
| aut testudineae carmen inerme lyrae, | |
| sed quali aspexit Pelopeum Agamemnona vultu, | |
| egessitque avidis Dorica castra rogis, | |
| aut quali flexos solvit Pythona per orbes | 35 |
| serpentem, imbelles quem timuere deae. | |
| mox ait 'o Longa mundi servator ab Alba, | |
| Auguste, Hectoreis cognite maior avis, | |
| vince mari: iam terra tuast: tibi militat arcus | |
| et favet ex umeris hoc onus omne meis. | 40 |
| solve metu patriam, quae nunc te vindice freta | |
| imposuit prorae publica vota tuae. | |
| quam nisi defendes, murorum Romulus augur | |
| ire Palatinas non bene vidit aves. | |
| en, nimium remis audent: pro, turpe Latinos | 45 |
| principe te fluctus regia vela pati! | |
| nec te, quod classis centenis remigat alis, | |
| terreat: invito labitur illa mari: | |
| quotque vehunt prorae Centauros saxa minantis, | |
| tigna cava et pictos experiere metus. | 50 |
| frangit et attollit vires in milite causa; | |
| quae nisi iusta subest, excutit arma pudor. | |
| tempus adest, committe ratis: ego temporis auctor | |
| ducam laurigera Iulia rostra manu.' | |
| dixerat, et pharetrae pondus consumit in arcus: | 55 |
| proxima post arcus Caesaris hasta fuit. | |
| vincit Roma fide Phoebi: dat femina poenas: | |
| sceptra per Ionias fracta vehuntur aquas. | |
| at pater Idalio miratur Caesar ab astro: | |
| 'sum deus; est nostri sanguinis ista fides.' | 60 |
| prosequitur cantu Triton, omnesque marinae | |
| plauserunt circa libera signa deae. | |
| illa petit Nilum cumba male nixa fugaci | |
| occultum, iusso non moritura die. | |
| di melius! quantus mulier foret una triumphus, | 65 |
| ductus erat per quas ante Iugurtha vias! | |
| Actius hinc traxit Phoebus monumenta, quod eius | |
| una decem vicit missa sagitta rates. | |
| bella satis cecini: citharam iam poscit Apollo | |
| victor et ad placidos exuit arma choros. | 70 |
| candida nunc molli subeant convivia luco; | |
| blanditiaeque fluant per mea colla rosae, | |
| vinaque fundantur prelis elisa Falernis, | |
| perluat et nostras spica Cilissa comas. | |
| ingenium potis irritat Musa poetis: | 75 |
| Bacche, soles Phoebo fertilis esse tuo. | |
| ille paludosos memoret servire Sygambros, | |
| Cepheam hic Meroën fuscaque regna canat, | |
| hic referat sero confessum foedere Parthum: | |
| 'reddat signa Remi, mox dabit ipse sua: | 80 |
| sive aliquid pharetris Augustus parcet Eois, | |
| differat in pueros ista tropaea suos. | |
| gaude, Crasse, nigras si quid sapis inter harenas: | |
| ire per Euphraten ad tua busta licet.' | |
| sic noctem patera, sic ducam carmine, donec | 85 |
| iniciat radios in mea vina dies. |