| Hinc ubi legati rediere, negata ferentes | 14.527 |
| arma Aetola sibi, Rutuli sine viribus illis | |
| bella instructa gerunt, multumque ab utraque cruoris | |
| parte datur; fert ecce avidas in pinea Turnus | 530 |
| texta faces, ignesque timent, quibus unda pepercit. | |
| iamque picem et ceras alimentaque cetera flammae | |
| Mulciber urebat perque altum ad carbasa malum | |
| ibat, et incurvae fumabant transtra carinae, | |
| cum memor has pinus Idaeo vertice caesas | 535 |
| sancta deum genetrix tinnitibus aera pulsi | |
| aeris et inflati conplevit murmure buxi | |
| perque leves domitis invecta leonibus auras | |
| 'inrita sacrilega iactas incendia dextra, | |
| Turne!' ait. 'eripiam: nec me patiente cremabit | 540 |
| ignis edax nemorum partes et membra meorum.' | |
| intonuit dicente dea, tonitrumque secuti | |
| cum saliente graves ceciderunt grandine nimbi, | |
| aeraque et tumidum subitis concursibus aequor | |
| Astraei turbant et eunt in proelia fratres. | 545 |
| e quibus alma parens unius viribus usa | |
| stuppea praerupit Phrygiae retinacula classis, | |
| fertque rates pronas medioque sub aequore mergit; | |
| robore mollito lignoque in corpora verso | |
| in capitum faciem puppes mutantur aduncae, | 550 |
| in digitos abeunt et crura natantia remi, | |
| quodque prius fuerat, latus est, mediisque carina | |
| subdita navigiis spinae mutatur in usum, | |
| lina comae molles, antemnae bracchia fiunt, | |
| caerulus, ut fuerat, color est; quasque ante timebant, | 555 |
| illas virgineis exercent lusibus undas | |
| Naides aequoreae durisque in montibus ortae | |
| molle fretum celebrant nec eas sua tangit origo; | |
| non tamen oblitae, quam multa pericula saepe | |
| pertulerint pelago, iactatis saepe carinis | 560 |
| subposuere manus, nisi siqua vehebat Achivos: | |
| cladis adhuc Phrygiae memores odere Pelasgos | |
| Neritiaeque ratis viderunt fragmina laetis | |
| vultibus et laetis videre rigescere puppim | |
| vultibus Alcinoi saxumque increscere ligno. | 565 |