| IV | |
| O mihi care quidem semper, sed tempore duro | 3.4.1 |
| cognite, res postquam procubuere meae, | |
| usibus edocto si quicquam credis amico, | |
| vive tibi et longe nomina magna fuge. | |
| vive tibi, quantumque potes praelustria vita: | 5 |
| saevum praelustri fulmen ab igne venit. | |
| nam quamquam soli possunt prodesse potentes, | |
| num prosit potius, siquis obesse potest? | |
| effugit hibernas demissa antemna procellas, | |
| lataque plus parvis vela timoris habent. | 10 |
| aspicis ut summa cortex levis innatet unda, | |
| cum grave nexa simul retia mergat onus? | |
| haec ego si monitor monitus prius ipse fuissem, | |
| in qua debebam forsitan Vrbe forem. | |
| dum mecum vixi, dum me levis aura ferebat, | 15 |
| haec mea per placidas cumba cucurrit aquas. | |
| qui cadit in plano—vix hoc tamen evenit ipsum— | |
| sic cadit, ut tacta surgere possit humo; | |
| at miser Elpenor tecto delapsus ab alto | |
| occurrit regi debilis umbra suo. | 20 |
| qui fuit, ut tutas agitaret Daedalus alas, | |
| Icarus immensas nomine signet aquas? | |
| nempe quod hic alte, demissius ille volabat; | |
| nam pennas ambo non habuere suas. | |
| crede mihi, bene qui latuit bene vixit, et intra | 25 |
| fortunam debet quisque manere suam. | |
| non foret Eumedes orbus, si filius eius | |
| stultus Achilleos non adamasset equos; | |
| nec natum in flamma vidisset, in arbore natas, | |
| cepisset genitor si Phaëthonta Merops. | 30 |
| tu quoque formida nimium sublimia semper, | |
| propositique, precor, contrahe vela tui. | |
| nam pede inoffenso spatium decurrere vitae | |
| dignus es et fato candidiore frui. | |
| quae pro te ut voveam, miti pietate mereris | 35 |
| haesuraque mihi tempus in omne fide. | |
| vidi ego te tali vultu mea fata gementem, | |
| qualem credibile est ore fuisse meo. | |
| nostra tuas vidi lacrimas super ora cadentes, | |
| tempore quas uno fidaque verba bibi. | 40 |
| nunc quoque summotum studio defendis amico, | |
| et mala vix ulla parte levanda levas. | |
| vive sine invidia, mollesque inglorius annos | |
| exige, amicitias et tibi iunge pares, | |
| Nasonisque tui, quod adhuc non exulat unum, | 45 |
| nomen ama: Scythicus cetera Pontus habet. |